M A G N I F I C O

 

PAGSUSURI SA PELIKULA

“MAGNIFICO”

 

 

 

I. PANIMULA

           

Ang pelikulang Magnifico ay tungkol sa buhay ng isang batang musmos na namulat sa isipan dahil sa kahirapan. Inilarawan dito ang mga pagsisikap at tagumpay, kabutihang loob, bawat pagmulat ng kanyang mata sa mga bawat bagong umagang darating sa kanya at lalong-lalo na ang mga pagbabagong naganap noong kamatayan niya.

 

II. PAMAGAT

           

Ang pamagat nitong “Magnifico” ay tumutugon sa pangunahing tauhan ng pelikula, isang batang musmos na namulat ang kaisipan dahil sa kahirapan.

 

III. KARAKTERISASYON AT PAGGANAP

 

MGA PANGUNAHING TAUHAN:

 

     JIRO MANO – Magnifico; Pikoy (ang batang musmos)

     LORNA TOLENTINO – Edna; Ina ni Pikoy

     ALBERT MARTINEZ –Geraldo; Ama ni Pikoy

     GLORIA ROMERO – Lola ni Magnifico

     DANILO BARRIOS – Miong; kuya ni Magnifico

     CECILIA RODRIGUEZ – Mrs. Doring

     ISABEL DE LEON – Helen; kapatid ni Magnifico

 

IBA PANG TAUHAN:

 

v  ALLYSON GONZALES – Makoy

v  SUSAN AFRICA -  Pracing

v  AMY AUSTRIA – Tessie

v  CHERRY PIE PICACHE – Cristy

v  MARK GIL – Domeng

 

 

IV. GENRE NG PELIKULA

           

Ang magnifico ay isang Drama-trahedya na pelikula na gawang pinoy.

V. TEMA

 

Ang payak na pamumuhay, mga pasanin at mga dagok sa buhay ng karaniwang kinahaharap ng bawat Pamilyang Pilipino. Umiikot ang istorya sa kamunduhan ng kahirapang nararanasan ng isang ordinaryong tao, ang mga pagsisikap, tagumpay at kabutihang loob.

 

 

VI. SINEMATOGRAPIYA

 

Ito ay isang pelikulang sumasalamin ng pag-asa. Na sa gitna ng patong patong na problema ay magagawa pa rin itong solusyunan sa simpleng paraan at sa abot ng makakaya.

 

            Ang anggulo nito ay nasa ayos at maganda ang mga kuha upang maging makatotohanan. Ang kalinawan nito sa bawat senaryo ay napakasimple at napakadramatic. Kitang kita ang lahat ng pagkilos at mga bagay na maaring magpagalaw ng pelikula sa paraang makatotohanan at may sistema.

 

 

VII. PAGLALAPAT NG MUSIKA AT TUNOG

 

Maganda ang nilapat na tunog  kapag ang bida ay umiiyak naging angkop ang tunog nito at naging nakakaiyak.

Maganda at mahusay ang musika nito. Bumagay ito sa genre ng pelikula. Si Lutgardo Labad ang naglapat ng mga sound effect napakasimple at dramatic ang mga nilagay na tunog.

 

 

VIII. PRODUCTION DESIGN

 

Simple at angkop na angkop sa pelikula na siyang nagpaganda ng kinalabasan ng dramang ito dahil halos lahat ay bumagay sa tema. Napag ukulan din ito ng pansin kaya gumanda ang pelikula ito dahil sa set o sa lugar na ginawa  ang pelikula.

 

 

IX. DIREKSYON

 

Sa direksyon ni Maryo J. delos Reyes isang batikang director at isa rin sa award winning at nominado sa ibat ibang parangal. Maayos at maganda ang pagkadirek, napakaepektib ng ginawa niya at naging makatotohanan at sobrang nakakaiyak ang istoryang ito.

 

X. BUOD

           

Si Magnifico ay lumaki sa mahirap na pamilya. Kahit bata pa lang siya ay tinutulungan niya ang mga may nangangailangan. Tumutulong siya sa kanyang pamilya tulad ng pag-aalaga sa kanyang lola at kapatid na may sakit. Dahil sa kahirapan ang kanyang pamilya, naging malaking problema sa kanila ang pagkakaroon ng sakit ng kanyang lola. May taning na rin ang buhay ng kanyang lola, kaya sa pagnanais niyang makatulong sa kanyang pamilya gumawa siya ng paraan upang paghandaan ang burol ng kanyang lola. Siya ay gumawa ng kabaong at siya ang naghanda ng kasuotan kapag namatay na ang kanyang lola na may taning na ang buhay. Sinikap niyang tugunan ang pangangailangan ng kanyang pamilya tulad ng anyang kapatid na babae na pinapasan niya sa likod at ang nakatatandang kapatid na natanggalan ng iskolarship. Marami ang natulungan ni Magnifico tulad nila Ka Doring na galit na galit sa mundo at sina Cristy at Fracing na may tampuhan ngunit sa huli ay nagbati rin. Punumpuno ng kabutihan si Magnifico. Ngunit sa kasawiang-palad ay nahagip siya ng isang sasakyandahil sa pagliligtas niya kay Domeng. Ito ay naging dahilan ng kanyang maagang kamatayan. Maraming tao ang nakiramay sa pagkamatay ni Magnifico. Ang paghahandang burol para sa kanyang lola ay ginamit para sa kanyang pagpanaw. Ang kabutihan ni Magnifico ay mananatili sa puso at isip ng mga taong kanyang natulungan at nakasama.

 

XI. KWENTO

           

Sa pag-andar ng kwento ipinakikilala ang bawat tauhan ayon sa mga sitwasyong nagaganap. Ang paglalahad ng kwento ay makikita sa pamamaraan ng pagsasalita ng bawat taong nariyon sa isang eksena.

 

 

XII. ARAL NG PELIKULA

 

Hayag na ipinakita sa kwento na ang pagtulong sa kapwa ay hindi nasusukat sa gulang o katayuan sa buhay dapat ito ay bukal sa puso na walang hinihintay na kapalit. Alalahaning ang kabutihang itinanim ay kabutihan rin ang siyang aanihin. Masasabing si Magnifico ay isang payak na halimbawa ng tunay at wagas na kabutihan.

 

XII. KONKLUSYON

 

Isa ito sa mga pelikulang di makakalimutan ng sino man, kahit paulit ulit mo man itong panuorin pilit at pilit paring pupukaw sa damdamin ng manonood. Naipapakita dito ang pagmamahal sa kanyang pamilya na kalian man ay hindi masusuklian ng anu mang bagay dito sa mundong ibabaw. Ang sakripisyo at pagmamahalan ng kanyang pamilya ay nagsisilbing inspirasyon para malampasan ang bawat pagsubok sa buhay na hindi ka susuko at gagawa ka ng paraan para lang sa ikabubuti ng iyong pamilya. At bilang isang bata hindi biro ang mga sakripisyo niya para lang kanyang sariling kaligayahan at interes pilit paring niyang iniisip ang kapakanan ng bawat isa. Hindi maiiwasan na kung minsan ay nasusubok ang tatag at pananalig ng bawat isa gayumpaman sa kahit na anong pagsubok napakahalaga ng suportang nakukuha ng bawat isa sa kanyang pamilya upang magawa malampasan ang kahit anong pasanin sa buhay. Lagi ring alalahanin na ang kabutihan at kababaang loob kailanman ay hindi mapapalitan ng kahit anong bagay.